[PiN-diskusjon] Pressemelding: Regjeringa opprettar personvernkommisjon

Petter Reinholdtsen pere at hungry.com
Søn 17. Des 2006 20:43:34 CET


Her er en sak som jeg håper får noen av medlemmene i
personvernforeningen til å løfte pennen for å bidra til den offentlige
debatten. :)


Pressemelding

Nr.: 52/2006
Dato: 14.12.06
Kontaktperson: Informasjonsrådgjevar Jan-Anders Dam-Nielsen, tlf 415 07 554
Regjeringa opprettar personvernkommisjon

Regjeringa vil opprette ein personvernkommisjon som skal vurdere om
personvernet er godt nok verna i dagens høgteknologiske
samfunn. Fornyings- og administrasjonsminister Heidi Grande Røys håper
ein personvernkommisjon kan føre til at debatten om personvernet blir
meir offentleg.

Det finst mange eksempel på at grensene mellom det som er offentleg og
privat blir viska ut og at det stadig blir vanskelegare å verne om sin
eigen rett til anonymitet. På fleire og fleire stader vi ferdast i
kvardagen blir vi overvakte av kamera. Fotoapparat og videokamera har
blitt integrerte i mobiltelefonar og sørgjer for at vi alle kan bli
tekne bilete av når og kor som helst.

- Personvernet blir utfordra på ein ny måte i informasjonssamfunnet,
  og eg meiner det er behov for å vurdere om den nye teknologien som
  omgir oss stadig meir fører til at vi må endre oppfatninga vår om
  personvern og datatryggleik. Personvernkommisjonen vil få som
  oppgåve å vurdere lover og reglar samtidig som målet også er å skape
  ein brei offentleg debatt om personvern, seier fornyingsministeren.

Sjølv om mandatet for kommisjonen enno ikkje er klart, legg Heidi
Grande Røys vekt på at eitt av områda ho vil be kommisjonen ta opp, er
spørsmålet om vi har ein rett til å vere anonyme i dagens samfunn.

- Det er ein interessant og viktig debatt om vi skal ha ein lovfesta
  rett til å ferdast anonymt eller om vi må godta at somme alltid veit
  kor vi har vore og når vi var der. Det bør diskuterast kva forholdet
  skal vere mellom å opprettholde tryggleiken i samfunnet gjennom
  overvaking og retten vår til privatliv og anonymitet, seier ho.

Fredag 15. desember legg fornyings- og administrasjonsministeren fram
den første breie stortingsmeldinga om IKT. Der vil det bli lansert
enda fleire tiltak som skal sikre personvernet si stilling i tida
framover. I tillegg blir det lansert ei rekkje tiltak på andre
IKT-relaterte område. Eit av hovudmåla med meldinga er å heve
IKT-politikk høgare på den politiske dagsordenen, og at det blir sett
i gong ein brei offentleg debatt om IKT-sektorens utvikling og
påverknad på det daglege livet vårt.



More information about the pin-diskusjon mailing list